Holly-Marie Cato

SIARADWYR YN YR ŴYL

Mae Holly-Marie Cato yn ffotograffydd dogfennol a masnachol. Dan ddylanwad ei chefndir mewn Pensaernïaeth, mae gwaith Cato’n ymchwilio’n drylwyr i bobl yn adennill lle yn yr amgylchedd adeiledig. Wrth weithio, mae Cato wedi teithio i bedwar ban byd i fannau fel Nicaragwa a Mumbai er mwyn dod o hyd i straeon go iawn am wytnwch, hawliau dynol a chadwraeth bywyd gwyllt, gan greu cysylltiadau ag elusennau ar lawr gwlad a ffurfio partneriaethau â brandiau rhyngwladol. Mae ei gwaith yn arddangos gras a gonestrwydd ac yn portreadu pobl ag urddas. 

“Mae fy ngwaith yn y bôn yn sôn am gysylltiad, pethau sydd gan bawb yn gyffredin yn y profiad dynol, a chlodfori’r gwahaniaethau mawr ac amrywiol. Rydw i’n ymdrin â chrefydd, hunaniaeth, dadleoli pobl, adennill lle a sofraniaeth dros dir.”

Mae Swift River yn ymchwilio i’r gymuned wledig yn y mynyddoedd lle symudodd nain a thaid Cato i fyw. Yn ogystal â thrigolion sy’n mudo’n llu, mae Cato’n dogfennu bywydau’r bobl sy’n aros ar y mynydd a’r berthynas gymhleth sydd ganddynt â’r dyfroedd o’u cwmpas, a’r ffordd y maent yn cael eu hamddifadu o’r adnodd naturiol hwnnw, fel cynifer o gymunedau brodorol eraill ledled y byd. 

Heavy is The Mantle:

Mae Heavy is The Mantle yn dogfennu’r diwrnodau cyn i’r Esgob Herbert Cato ymddeol fel pennaeth eglwys City Mission a throsglwyddo’r cyfrifoldeb i’r arweinydd nesaf. Wedi’i hysbrydoli gan atgofion melys o fynd i oedfaon y Sul â’i diweddar nain, mae Holly-Marie Cato yn ymchwilio i ryfeddodau Cristnogaeth yn y Caribî, fel y gwisgoedd crand yn y pulpud, canu mawl egnïol, y cymun a’r pregethu theatrig. Heavy is the Mantle oedd arddangosfa gyntaf Cato ar ei phen ei hun yn Oriel Leica yn Llundain (2023), ac mae’n ymdrin ag agweddau ysbrydol a symbolaidd ar y cyfrifoldeb sydd gan arweinyddion eglwysi yn eu parchedigrwydd a’u gorchwyl o drosglwyddo’r cyfrifoldeb hwnnw a’r traddodiadau i’r genhedlaeth nesaf. 

Notting Hill Carnival:

Mae Notting Hill Carnival yn dogfennu naw mlynedd o’r ŵyl fwyaf yn Ewrop, sy’n denu dau filiwn o bobl bob blwyddyn i lecyn bach yng ngorllewin Llundain i ddathlu diwylliant Affro-Caribïaidd a gwytnwch y gymuned sydd wedi mewnfudo i Brydain. Dechreuodd Carnifal Notting Hill yn dilyn y terfysg hiliol enbyd yn erbyn y trigolion Du yn y 1960au, fel ffordd o wrthdystio a gwrthsefyll. Wrth fynd i’r carnifal fe welwch chi dyrfa enfawr a llond y lle o gerddoriaeth uchel, dawnsio, bwyd ac anhrefn, hyd yn oed, ond yn y bôn mae’n ymwneud ag adennill lle mewn ardal sy’n prysur fynd yn gynefin i bobl gefnog. Drwy feddiannu’r lle fel hyn, mae’r carnifal yn rhoi’r cyfle i’r gymuned fynegi gorfoledd beth bynnag eu hamgylchiadau. 

Maha Kumbh Mela

Mae Maha Kumbh Mela yn gofnod gweledol o’r cynulliad mwyaf o bobl yn y byd, lle ddaeth mwy na hanner biliwn o Hindwiaid ar bererindod i Prayagraj yn India, i ymdrochi yn y Ganges er mwyn puro’u hunain o’u pechodau, hwyluso’u hynt i’r byd nesaf a bendithio eu teuluoedd. Cynhaliwyd y digwyddiad yn ystod cyfliniad unigryw o’r planedau nad yw’n digwydd ond unwaith bob 144 o flynyddoedd.

www.hollycato.com